अनुज गन्मी ‘फट्याङ्ग्रो’
माझिमेलाको पाखो
लामिटाकुरी माथी बसेर खुब हेँरे
एक दिन घरको धुरीबाट
अनि मलाई याद छ बाउन्न साल
मलाई सम्झना छ हाले गोरु र हस्तराज
बाली एैसेलु र काफलको बोट
घरमुनीको टिम्मरको रुख
खोल्स्याबटोको बास
र बुधि भाउजु ।
सिस्नुको झ्याङ र आरुको बोट
मलखाल्डोको मल र कुकुर दौडेको मेलो
बिरालोले मारेको मुसो
यि सबै याद छ मलाई ।
एउटा इतिहास परालको आगो
अर्काे रमाइलो पानीको मूल
एउटा पीडा माइली बज्यै
दयालु मन र मेरी आमा
बदनामको नाता दाजुभाई
मजाको सन्देश छोरीको विहे
बिशाक्त सोच पानीको पाइप र माइलो दाजु
विहानी मिर्मिरे, पुलीसको घेराबन्दि
हराएको होष र बहादुरी मन
मेरा बा र उनका काका
मेरो परिवार र मोती काकी
विगत र वर्तमान, माया र घृणा
गुमनाम भातृत्व र हराएको संयम
यि सबै क्षण छाल बनि तैरिरहन्छन मन भित्र
पीडा उस्तै जुन दिन माझिमेलो लुटिएको थियो
माले गोरु लडाइएको थियो
गिद्द मासु लुछ्दै थिए उसको
जसरी हामी लुछिएका थियौ
जल्दै थियो माझिमेलो लाग्थ्यो
मेरा टाकोको केशमा आगो सल्काएको जस्तो
सिनो खाने गिद्द र हस्तराज
खुसिको अपहरण र हत्या अनि यमराज
दुइटा राजको राजसँग तर्सिने गरेको छ
मेरो मन र माझिमेलोको पाखो ।
anuj _ganmi@yahoo.com
No comments:
Post a Comment